ئەگەر مامە کەریمم پارلمانتار بوایە… (تەنز)
کە بیری لێ دەکەمەوە چی ئەبوا مامە کەریمم لە جیاتی ئەو ڕۆمانیە ژێرسک ڕەوغەنیە، پرادۆێکی چوار دەری لە ژێر پێدا بوایە و ئەو ڕیشە ڕەقەی جوان بتاشیایە و بە کۆت و شەرواڵێکی خەتخەتی ئاویی نەفتی چەن بە هەیبەت دەبوو، جا زەنگی بدایە:« ئەرێ هەتیو هەتا کەی دەتەوێ لە ئەو ئیدارە شڕۆڵە دابنیشی؟
وەرە بۆ لای خۆم لە تاران لە ماوەی یەکساڵدا دەتکەمە جێگری وەزیر »منیش دەم گوت :«مامە واز بێنا جێگری چی … کەی لەو سەرەوە جێگەی ئێمە دەکەنەەوە» ئەویش دەیگوت :«حەی یا حەی، بە سەرت ئەوە دۆینێ شەو لەگەڵ وەزیرەکەتان بە یەکەوە شاممان خوارد، دەیگوت هەرکارێکت بێت لە سەرچاوی دەنێم بەو شەرتەی واز لەم ڕوون کردنەوە و پرسیار و عەلەم و قەلەمە بێنی… هەر ئەوەبوو تۆ کەوتیتە بیرم کە بتهێنم بۆ تاران، ئەوە نیە باوکت هەر گلەیم لێ دەکا؟،
گوتم کاکە ئەوەمن تازە بوومەتە نۆینەر و با یەکساڵی لێ تێپەڕێ و چوار گەورە پیاو بمناسن خۆم دەزانم چی ئەکەم…» کە دەچمە ناو نرخیەوە هەر بەڕاستی ئەگەر مامۆێک، خاڵۆێک، بنە ئامۆزاێک یا خزمێکی تەنانەت دووریشم پارلمانتار، بەڕێوەبەر یا دەسەڵاتدار بوایە ئێستە حاڵ و وەزع و پلەو پایەم چۆن بوو؟ ناڵێم جێگری وەزیر، بەڵام هەر لەم ئیدارەی خۆمدا کەسێک بووم بۆ خۆم، چیم لە هاشمە گێج کەمترە کە بە بۆنەی برای خاڵۆژنیەوە بوەتە ڕەئیس و پێ ئەڵێن موهەندس هەواسی، یا سابیرە رەق و تەق ڕۆژی هەوەڵ هاتە سەرکار نەیدەزانی کەمپیوتەرەکەی خامووش و ڕۆشن بکات، ئێستەش نازانێ نامەیەکی کورتی ئیداری بنووسێ، ئەوە قەولیان پێ داوە تا چەند مانگێ تر بچێتە ژمێریاری.
نازانم کارەکان خوا بۆچی وایە هەرچی گێج و سڕ بوو لەم ئیدارەیەدا بو بە کەسێ بۆ خۆی و ئێمە و چەن کەسی تر لە بێکەسی خۆماندا هەر خەریکی دەرس و کتێبین و هەرچی کاریشە بە ڕێک و پێکی دەیزانین، هەروەکوو حەماڵ پازدە ساڵە ئەسوڕێینەوە و هەر لەو پلە و پایەی خۆماندا تەکانمان نەخواردوە، کێمان هەیە دەسمان بگرێ؟ ئەوە مامە کەریمە، ئەوەش وەزعیەتی، چوار ساڵە ناوی نوسیوە تەراکتورێکی نۆێ پێ بدەن، هەر ناوی دەرناێت، ئەڵێ :«لە جەهاد کەشاوەرزی کەس ناناسی ناوەکەم بخاتە بەرەوە » ئەڵێم: مامۆ یەک کەسم دەناسی ڕەفێقی گیانی بووین، ئەویش هیچ دەسەڵاتی نەبوو.
ئەڵێ: ئێستە لە کویێە؟ ئەڵێم: هیچ، لەسەر کار دەریان کردوو ئێستە شاتر نانەوایە. ئەوەیش خاڵو عەلیمە ئەوندە ساعەت فرۆشی کردوە و شار بەشار گەڕاوە چۆکی دەیشێت ئەڵێ: ڕۆڵە بزا لە ئیدارەیێ، شیرکەتێ شتێ کارێکم بۆ نادۆزرێتەوە ؟
ئەڵێم: خاڵۆ خۆت ماشەڵا دنیا دیدەی ئەم شارەی خۆمان کاری کەمە، تەنانەت ئابدارچیش…
ئەڵێ: ئەی تۆ لەوێدا چی ئەکەی ؟
ئەڵێم:خاڵۆ من پلەو پایەم لە خوارەوەیە کەسم نیە.
دەی ئێوە بڵێن، من کێم هەیە ؟
کوورش محەممەدی (سنه)
